प्यूठान । सहकारी ठगी प्रकरणका आरोपी जीबी राईलाई पूर्व गृहमन्त्री रबि लामीछानेका कारण ल्याउन नसकिएको प्रहरीले बताएको छ । आरोपी राईलाई पक्राउ गर्न मलेशिया पुगेका प्रहरीले गृहमन्त्री रमेश लेखकलाई यस्तो बताएका हुन् । केही दिनअघि भएको ब्रिफिङमा प्रहरी महानिरीक्षक (आईजीपी) वसन्तबहादुर कुँवरसहित मलेसिया गएका प्रहरी उपरीक्षक (एसपी) सहितका अधिकारी सहभागी थिए । त्यसक्रममा प्रहरीले राईलाई फिर्ता ल्याउन पूर्वगृहमन्त्री रवि लामिछानेकै कारण समस्या भएको स्रोतले जिकिर गरेको छ ।

लामिछानेले उपप्रधान एवं गृहमन्त्री हुँदा मलेसियाका गृहमन्त्री सैफुदिन नासुतिन इस्माइलसँग टेलिफोन कुराकानी गरेका थिए । त्यस क्रममा उनले जीबी राईलाई फिर्ता पठाइदिन आग्रह गरेको मन्त्रालयका अधिकारीहरुले सार्वजनिक गरेका थिए ।

‘उहाँहरु बीच के–के कुरा भएको थियो, थाहा भएन’, प्रहरीको भनाइ उदृत गर्दै मन्त्रालय स्रोतले भन्यो, ‘तर, लामिछाने माननीयज्यूले मन्त्री स्तरमा कुरा गरेपछि यो विषय प्रहरीको तहबाट बाहिर पुग्यो भन्ने सन्देश मलेसियाका अधिकारीहरुबाट पाएको नेपाल प्रहरीबाट ब्रिफिङ भएको छ ।’
दौ दोस्रो साता मलेसिया गएको नेपाल प्रहरीको टोलीले क्वाललाम्पुरमा अन्तर्राष्ट्रिय अपराध प्रहरी संगठन (इन्टरपोल) को नेशनल कन्ट्रोल ब्यूरो (एनसीबी) का अधिकारीहरुसँग भेट गरेको थियो । त्यसक्रममा राईलाई फिर्ता ल्याउने प्रक्रियाबारे कुराकानी समेत भएको थियो ।

प्रहरी अधिकृतहरुले गरेको ब्रिफिङ अनुसार, एनसीबी मलेसियाका अधिकारीहरुले त्यसक्रममा राईको विषय आफूहरुभन्दा माथिल्लो तहमा पुगिसकेको बताएका थिए ।

‘मन्त्रीस्तरमा कुरा भइसकेकाले हामीले केही गर्न सक्ने स्थिति छैन’, एनसीबी मलेसियाका अधिकृतहरुलाई उदृत गर्दै स्रोतले भन्यो, ‘त्यही तहबाट मात्रै यो विषय टुंगो लाग्न सक्छ ।’

नेपाल प्रहरीका एक उच्च अधिकृतले राईलाई फिर्ता ल्याउने प्रक्रिया उच्च तहको समन्वयबाट मात्र टुंगो लाग्न सक्ने बताए । ‘मन्त्री तहसम्म कुरा नगरी तल–तलबाटै कुरा गरेर फिर्ता ल्याउनु पथ्र्यो, तर अघिल्लो मन्त्रीज्यूले सिधै माथि कुरा राखिदिँदा गाह्रो भयो’, उनले भने, ‘अहिले एकदमै बलियो कुटनीतिक र उच्चस्तरीय पहलविना राईलाई फिर्ता ल्याउन कठिन हुने स्थिति बनेको छ ।’

पोखराको सूर्यदर्शन, काठमाडौंको स्वर्णलक्ष्मी, बुटवलको सुप्रिम, वीरगञ्जको सानो पाइला, चितवनको साहारा चितवन र काठमाडौंको हाम्रो नयाँ कृषि सहकारीको ठगीमा संलग्न राईविरुद्ध इन्टरपोलमा रेड नोटिस छ । रेड नोटिस जारी हुँदा इन्टरपोलका सदस्य रहेका १९३ मध्ये जुनसुकै देशमा सम्बन्धित व्यक्ति देखिए एनसीबीले नोटिस जारी गर्न सिफारिस गर्ने मुलुकलाई खबर गर्छ ।
अनलाइन खबरबाट साभार